01.08.2021
От ыйын 26 күнүттэн атырдьах ыйын 4 күнүгэр дылы Мэҥэ-Хаҥалас Балыктааҕар, биһиги уолбут эдэр фермер Дьулустан Говоров оттуур "Дьоху" диэн алааһыгар Дорхоон Дохсун Ворогушин салайааччылаах "Хоһуун Хотуур" бырайыагынан 7 уол кэлэн көмө-ньыма буоллулар: Майаттан Сыроватскай Эрсан, Жирков Дэлэгэй, Иванов Эрэл, Николаев Мичил, Петров Володя, Григорьев Коля, Балыктаахтан Ноговицын Витя. Уолаттар бэйэлэрэ хотуурдаах кэлэн илиинэн от оҕустулар, охсубут отторун эмиэ илиинэн кыраабыллаан мунньан барыта 3 оту туруордулар. Көмөлөһөөччү Иннокентий Лебедев, салайааччы Дорхоон Дохсун бу өбүгэттэн кэлбит хотуурунан охсуу сатабылын уолаттарга көрдөрөн үөрэттилэр, эттэрин-сииннэрин эрчийдилэр. Минньигэс аһынан кинилэри аһатта Анивера Саввинова. Бу үтүө хамсааһыны өйдөөбүт, өйөөбүт киһинэн буолар эбит Майа муниципальнай тэриллии баһылыга Дмитрий Иванович Тихонов. Туох үтүө хамсааһын барыта ким эмиэ сэргиир, өйүүр, көмөлөһөр буоллаҕына, табыллар, ыччат санаата кэлэр.
Хотуурунан охсууну баһылаабыт хоһуун уолаттарга, салайан илдьэ сылдьыбыт Дорхоон Дохсуҥҥа, Иннокентийга, Анивераҕа биһиги дьиэ-кэргэн махталбыт муҥура суох, инникитин даҕаны уолаттар ити иҥэриммит сатабылларын быспакка илдьэ сылдьан, олоххо туһаналларыгар! Дьулус бэйэтэ оҕо сылдьан 'Төлкө" лааҕырыгар, уһуйааныгар иитиллэн тахсыбыта. Уһуйааччытын Дорхоон Дохсуну кытта ыччаты үлэҕэ уһуйууга бииргэ үлэлиириттэн үөрэбит, кэскиллээх үлэ өссө сайдан, кэҥээн иһиэ диэн эрэнэбит!
Ангелина Говорова, Балыктаах
Дата создания: 13.08.2021
Дата обновления: 13.08.2021
Дата публикации: 01.08.2021